УИХ-ын хаврын ээлжит чуулган өчигдөр нээлтээ хийлээ. Энэ чуулганаар 35 асуудал хэлэлцэхээр УИХ-ын дарга захирамж гаргасан. Энэ ээлжит чуулганаар Эх орны хишиг, мөн ээлжит бус чуулганаар хэлэлцэж эхлээд хойшлуулсан Оюутолгойн ордыг ашиглах хөрөнгө оруулалтын гэрээний төслийг хаврын чуулганаар үргэлжлүүлэн хэлэлцэхээр төлөвлөсөн.

Улс төрийн хилс хэрэгт хэлмэгдэгсдийг цагаатгах, тэдэнд нөхөн олговор олгох тухай хуульд өөрчлөлт оруулах тухай хуулийн төсөл,Төрийн тэргүүний санаачилсан Улсын бүртгэлийн ерөнхий хуулийн төсөл хэлэлцэх асуудлын дарааллын эхэнд бичигдэж байна. Дараа нь Өрсөлдөөний тухай хуулийн төсөл, Барилгын тухай хуульд нэмэлт оруулах тухай хуулийн төсөл, Нийлэг уутны хэрэглээг хязгаарлах тухай хуулийн төслийг хэлэлцэхээр төлөвлөжээ. Дээрх төслүүдийг энэ долоо хоногт Байнгын хороодоор хэлэлцэхээр төлөвлөсөн байна.

УИХ-ын гишүүд чуулганы завсарлагаар хөдөө орон нутагт ажилласан. Гишүүд тойрогтоо ажиллахдаа УИХ-аар баталсан хууль, тогтоомжийг танилцуулах, хэрэгжилттэй нь танилцахаас гадна иргэдийн уламжилсан санал бодлыг УИХ-ын дарга Д.Дэмбэрэлд дамжуулжээ.

Иргэдийн хүсэлт, санал бодолд тулгуурлан хаврын чуулганаар хэлэлцэх хууль, тогтоомжийн дарааллыг баталсан тухайгаа Д.Дэмбэрэл дарга чуулганыг нээж хэлсэн үгэндээ онцлов. Эдийн засгийн хямрал парламентын анхааралд байнга байж, шаардлага гарвал дараалал харгалзахгүй, цаг алдалгүйгээр хэлэлцэн шийдэж байхыг спикер хэллээ. Хаврын чуулганы үргэлжлэх хугацаанд Монгол Улсын Ерөнхийлөгчийн тав дахь удаагийн сонгууль болно. Төрийн тэргүүнээ бүх ард түмнээрээ сонгох нь улс төрийн онцгой үйл явдал учир хуулийн хүрээнд шударга зохион байгуулах бүх шатны сонгуулийн байгууллага, албан тушаалтан онцгой анхаарах шаардлагатайг УИХ-ын дарга Д.Дэмбэрэл сануулав. Тэрээр сонгуульд иргэд, улс төрийн намууд, иргэний нийгмийн байгууллагууд улс төрийн өндөр соёлтой, нийгмийн идэвхтэй оролцохыг уриалав.

Ерөнхийлөгч Н.Энхбаяр хаврын чуулганы нээлтэд оролцож үг хэллээ. Тэрээр төрийн чадавхи сул байгааг шүүмжилж хүчтэй төрийн төлөө УИХ-ын гишүүд нэгдэж ажиллахыг захилаа. Эдийн засгийн хямралтай, иргэдийн амьдрал тарчигхан ийм үед нийгмийн халамжийг бууруулах шаардлагагүй гэж Төрийн тэргүүн үзэж байна. Тэрээр УИХ-ын бодлого, үйл ажиллагаанд ийм чиглэл өгснөөс гадна Ерөнхийлөгчийн сонгуулийн талаар ч хэлсэн үгэндээ дурдсан. Өнгөрсөн сонгуулиудын алдаа дутагдлаас сургамж авч шударга сонгууль явуулах, сурталчилгааны үеэр улс төр болоод төрийн байгууллага, иргэд ажил цалгардуулж болохгүйг сануулсан юм.