Засгийн газраас боловсруулсан Монгол Улсын 2008 оны төсвийн гүйцэтгэлийг батлах тухай, Монгол Улсын 2010 оны төсвийн хүрээний мэдэгдлийг зөвшөөрөх тухай УИХ-ын тогтоолын төслүүдийг УИХ-ын гишүүн, Сангийн сайд С.Баярцогт УИХ-ын дарга Д.Дэмбэрэлд өнөөдөр өргөн барилаа.
УИХ нэгдсэн төсвийн гүйцэтгэлийг хаврын чуулганаараа хэлэлцэж батлахаар Төсвийн байгууллагын удирдлага, санхүүжилтийн тухай хуульд заасны дагуу Засгийн газраас боловсруулсан тогтоолын төсөлд Монгол Улсын 2008 оны улсын төсвийн гүйцэтгэлийн орлогыг 1 463 943 717, 4 /нэг их наяд дөрвөн зуун жаран гурван тэрбум есөн зуун дөчин гурван сая долоон зуун арван долоо/ мянга, зарлагыг 1 745 484 297,4 / нэг их наяд долоон зуун дөчин таван тэрбум дөрвөн зуун наян дөрвөн сая хоёр зуун ерэн долоо/ мянган төгрөгөөр батлахаар тусгажээ. Энэхүү тогтоолын төсөл батлагдсанаар улсын төсвийн 2008 оны орлого, зарлагын нийт хэмжээ батлагдаж, төсвийн алдагдлыг тодорхойлох боломжтой болох юм байна.
Түүнчлэн Засгийн газар дараа жилийн төсвийн хүрээний мэдэгдлийг тавдугаар сарын 1-ний дотор УИХ-д өргөн мэдүүлэхээр хуульд заасны дагуу Монгол Улсын 2010 оны төсвийн хүрээний мэдэгдэл болон 2010-2012 оны төсвийн төсөөллийн үзүүлэлтүүд, Засгийн газрын дунд хугацааны зорилтуудыг хүлээн зөвшөөрөх агуулгатай УИХ-ын тогтоолын төслийг Засгийн газар боловсруулжээ. Төсвийн хүрээний мэдэгдэлд Засгийн газраас төлөвлөсөн дунд хугацааны төсвийн урсгал зардал болон орлогын хэмжээ, хөрөнгө оруулалт, төсвийн нийт болон урсгал тэнцэл, макро эдийн засгийн үндсэн үзүүлэлтүүд, холбогдох бусад танилцуулга, тооцоог багтаасан байна.
Төсвийн хүрээний мэдэгдлийг зөвшөөрснөөр улс орны нийгэм, эдийн засгийн хөгжлийн бодлого, зорилтуудыг хэрэгжүүлэхэд шаардагдах хөрөнгийн эх үүсвэрийг бүрдүүлэх, зарлага, санхүүжилтийг цаг хугацаанд нь оновчтой зохион байгуулж, дунд хугацааны төсвийн нийт тэнцлийн алдагдлыг зохистой төвшинд байлгах, эдийн засгийн чадавхи, цаашдын хөгжлийн нөөц бололцоог бодитой үнэлэх боломж бүрдэнэ гэдгийг тогтоолын төсөлд дурдсан байна гэж УИХ-ын Хэвлэл мэдээлэл, сурталчилгааны хэлтэс мэдээлэв.