Улсын Их Хурлын 2008 оны 36 дугаар тогтоолын хавсралтаар баталсан Монгол улсын эдийн засаг, нийгмийг 2009 онд хөгжүүлэх Үндсэн чиглэлийн 21.1-д “Хууль тогтоомж хоорондын зөрчлийг арилгах, уялдаа холбоог сайжруулах ажлын  хүрээнд иргэн, аж ахуйн чиглэлийн хууль тогтоомжийг харьцуулан судалж, энэ чиглэлийн хуулийн дөчөөс доошгүй хувийн давхардал, хийдлийг тогтоох ажлыг эхлүүлэх”-ийг Засгийн газарт үүрэг болгосон  билээ.  
     Хууль зүй, дотоод хэргийн яам, Германы техник хамтын ажиллагааны нийгэмлэгийн “Эдийн засгийн тогтвортой хөгжлийн эрх зүйн орчинг баталгаажуулах” төсөлтэй хамтран Монгол Улсын иргэн, эдийн засгийн хууль тогтоомжийн давхардал, зөрчил хийдлийг тогтоох тэдгээрийн уялдаа холбоог сайжруулан цэгцлэх ажлыг хийж эхлээд байна.
     Тус ажлын хүрээнд энэ 6 дугаар сарын 9-нд Хууль зүй, дотоод хэргийн яамны хурлын танхимд тус яамны Төрийн нарийн бичгийн дарга Г.Баясгалан, Германы техник хамтын ажиллагааны нийгэмлэгийн “Эдийн засгийн тогтвортой хөгжлийн эрх зүйн орчинг баталгаажуулах” төслийн удирдагч Л.Заяа,  Монголын Үндэсний худалдаа аж үйлдвэрийн танхимийн дарга С.Дэмбэрэл, Монголын Ажил олгогч эздийн  нэгдсэн холбооны ерөнхийлөгч Л.Нямсамбуу нар “Харилцан ойлголцлын санамж бичиг”-т гарын үсэг зурлаа.
Германы техникийн  хамтын  ажиллагааны нийгэмлэгийн “Эдийн засгийн тогтвортой хөгжлийн эрх зүйн орчинг баталгаажуулах” төслийн хүрээнд иргэн, эдийн засгийн чиглэлийн хууль тогтоомжийн уялдаа холбоог сайжруулах ажилд хамтран ажиллах зорилгоор энэхүү Санамж бичгийг үйлдсэн юм.
     Хамтын ажиллагааны зорилго нь  Монгол Улсад  хүчин  төгөлдөр  мөрдөгдөж буй иргэн, эдийн засгийн чиглэлийн хууль тогтоомжийн давхардал, зөрчил, хийдлийг арилгах, тэдгээрийн хоорондын уялдаа холбоог сайжруулах ажилд хамтран ажиллах, энэхүү үйл ажиллагааг  сурталчлан  таниулах,  бизнес эрхлэх хууль эрх зүйн  таатай орчин  бүрдүүлэхэд чиглэгдэнэ.
     Санамж бичиг болон төлөвлөгөөг хариуцан хэрэгжүүлэх хамтарсан ажлын хэсэг байгуулагдсан бөгөөд санамж бичгийн биелэлт болон төлөвлөгөөний хэрэгжилтийн явцыг хагас, бүтэн жилээр  дүгнэн тайлагнах юм.