СОНГОН ШАЛГАРУУЛАЛТЫН УРИЛГА

          Хууль зүй, дотоод хэргийн яамнаас Үндэсний эрх чөлөөний хувьсгалын 100 жилийн ойн хүрээнд  Монгол Улсад Хууль зүйн алба байгуулагдсаны 100 жилийн ойг угтаж “Монгол Улсын орчин цагийн хууль зүйн албаны үүсэл, хөгжил” сэдэвт эрдэм шинжилгээний бүтээлийн уралдаан зарлаж байна.

          БҮТЭЭЛИЙН БҮТЭЦ:

Монгол Улсын орчин цагийн эрх зүйн түүхэн хөгжлийг Үндсэн хуулийн байгуулалын түүхэн хөгжлийн дараахь үе тус бүрийг багтаасан 4 бүлэг бүтээл байхаар ерөнхий бүтцийг тодорхойлж болно. Үүнд:

1. Анхдугаар Үндсэн хууль батлагдан үйлчлэх үе /1911-1940/;

2. Хоёрдугаар Үндсэн хуулийн үеийн төр эрх зүйн түүхэн хөгжлийн үе /1940-1960/;

3.Гуравдугаар Үндсэн хуулийн үеэс шилжилтийн зурвас үе /1960-1992/;

4. Ардчилсан Монгол Улсын буюу эрх зүйн тогтолцооны шинэтгэлийн өрнөлтийн үе /1992 оноос хойш/.

БҮТЭЭЛИЙН АГУУЛГА:

- Монгол Улсын Хууль зүйн яам түүний албадын үүсэл хөгжил, тэдгээрийн гүйцэтгэсэн үүрэг;

- Хууль зүйн албаны хүрээнд бий болсон зарим тусгай алба /шүүх, өмгөөлөл, нотариат г.м./-дын үүсэл хөгжил, гүйцэтгэсэн үүрэг;

- Удирдлагын хүрээнд хууль зүйн яам болон орон нутгийн захиргааны албад үүсч хөгжсөн тухай;

- Монгол Улсын эрх зүйн шинэтгэлд хууль зүйн албаны гүйцэтгэж буй үүргийг онол, практикийн үүднээс нэгтгэн дүгнэх.

          БҮТЭЭЛД ТАВИГДАХ ТУСГАЙ ШААРДЛАГА:

          1. Бүтээл нь шинжлэх ухааны үндэслэлтэй байна

          2. Хууль зүйн эх сурвалж, албан ёсны тоо баримт, түүхийн амьд гэрчийн ярилцлага зэрэг баримтад үндэслэсэн, он, цаг хугацааг тодорхой заасан, ишлэл, тайлбар бүрэн зөв байна

          3. Түүхэн судалгаа, дүгнэлтээс гадна хууль зүйн албыг цаашид хөгжүүлэх санал, хөгжлийн гарцыг олох оролдлого хийсэн байна.

          ХЭМЖЭЭ:

Бүтээлийг Arial 12 үсгийн фонт, А4 форматын 45 мөрөөр 600 хүртэл хуудсанд багтаан бичсэн байна.

ОРОЛЦОГЧ:

Сонгон шалгаруулалтад хувь хүн бие даан болон багаар оролцож болно. Оролцогчид бүтээлээ Хууль зүй, дотоод хэргийн яамны Хууль зүйн бодлогын газарт ирүүлнэ.  Оролцогчдоос  ирүүлсэн бүтээлээс 1 бүтээлийг сонгон хэвлэнэ.

БҮРТГЭЛ:

Сонгон шалгаруулалтад оролцогч нь магистраас дээш зэрэгтэй, өмнө нь эрдэм шинжилгээний бүтээл туурвиж байсан туршлагатай байна. Оролцогчид 2009 оны 11 дүгээр сарын 10-ны дотор Хууль зүй, дотоод хэргийн яамны 312 тоот өрөөнд иргэний үнэмлэх болон бүтээлийн жагсаалтын хамт биеэр ирж бүртгүүлнэ.

ХУГАЦАА:

 Сонгон шалгаруулалтад оролцогчид бүтээлээ  2010 оны 12 дугаар сарын 01-ний  дотор Хууль зүй, дотоод хэргийн яамны Хууль зүйн бодлогын газарт ирүүлнэ.

Хууль зүй, дотоод хэргийн яам шалгарсан нэг бүтээлийг хэвлэнэ. Зохиогчийн эрх хамгаалагдана. Бүтээлд зөвхөн зохиогчийн зөвшөөрлөөр засвар оруулна.

 Дэлгэрэнгүй мэдээлийг 265092 дугаарын утас болон доорх хаягаар ирж авч болно.

Хаяг: Улаанбаатар-210646, Худалдааны гудамж 6/1, Засгийн газрын V байр.

Хууль зүй, дотоод хэргийн яам 312 тоот өрөө